မြန်မာနိုင်ငံကား
ဗုဒ္ဓသာသနာထွန်းကားသော နိုင်ငံတော်ဖြစ်၏။ သာသနာတော် ထွန်းလင်းရန်
သာသနာပြုပုဂ္ဂိုလ်များသည် စွမ်းစွမ်းတမံ သယ်ပိုးဆောင်ရွက်ခဲ့ကြပါသည်။
ထိုထိုသော သာသနာပြုပုဂ္ဂိုလ် အာဇာနည်များတွင် ရသေ့ကြီး ဦးခန္တီမှာ
များစွာထင်ရှားလှပါသည်။
ရသေ့ကြီးဦးခန္တီသည်
ထွက်ရပ်ပေါက် သိဒ္ဓိရှင် ဘိုးတော်အောင်မင်းခေါင်နှင့် အတိတ်ဘ၀များစွာ၌
ရေစက်ဆုံကြကာ တဦးပါရမီကို တဦးက ဖြည့်ဆည်းပေးခဲ့ကြောင်း သိရှိရပါသည်။
သာသနာနှစ် (၂၅၀၀)ကျော်တွင် ဘုရားရှင်၏ ဗျာဒိတ်တော်အရ သထုံပြည်နှင့်
ရာမညတိုင်းလုံးဆိုင်ရာတွင် သာသနာ့ဓာတ်ပန္နက် ရိုက်နှက်တော်မူရန်
ဘိုးတော်အောင်မင်းခေါင်က ရသေ့ကြီးဦးခန္တီအား အပ်နှင်းလွှဲအပ်ခဲ့သည်ဟု
မှတ်သားဖူးသည်။ ၀ိဇ္ဇာဓိုရ်ပုရပိုက်မှတ်တမ်း၌ အတိတ်ဘ၀တခုတွင် ဘိုးတော်
အောင်မင်းခေါင်သည် ဓမ္မစေတီဖြစ်ခဲ့ဖူးကြောင်း ရသေ့ကြီးဦးခန္တီမှာလည်း
ဓမ္မစေတီ ဓမ္မပါလရဟန်း ဖြစ်ခဲ့ ကြောင်း အဆိုရှိပါသည်။
ရသေ့ကြီးဦးခန္တီသည်
မြန်မာနိုင်ငံတ၀ှမ်းလုံးကို လှည့်လည်ကာ ဗုဒ္ဓသာသနာတော်ကြီး တည်တံ့ပြန့်ပွား
နိုင်ရေးအတွက် အားထုတ်ကြိုးပမ်းခဲ့၏။ ဘုရားစေတီပုထိုးများကို
ပြုပြင်ခြင်း၊ အသစ်တည်ခြင်းများကို ဆောင်ရွက်ခဲ့၏။ ရသေ့ကြီးဦးခန္တီသည်
ဘိုးတော်အောင်မင်းခေါင်၏ တာဝန်ပေးချက်အရ စေတီတော် များကို တည်ခဲ့ရာတွင်
အောက်ပါစေတီများမှာ ထင်ရှားကြလေ၏။
၁။ သထုံမြို့တွင် အဋ္ဌကထာကျမ်းပြု ဗုဒ္ဓဃောသအရှင် တည်ထားတော်မူခဲ့သော ဖောင်တော်ဦးဘုရားကို
ထပ်မံပြုပင် တည်ထားပြီးမြောက်ခဲ့၏။(ဉာဏ်တော်အမြင့် ၁၂၅-တောင် ရှိပါသည်)
၂။ မော်လမြိုင်မြို့အနီး ခရုံဂူတောင်အတွင်း၌ သကျသီဟဘုရားကြီးကို တည်ထားပြီးမြောက်ခဲ့ပါသည်။
ထို့အပြင် သိမ်း၊ စောင်းတန်း၊ ဇရပ်၊ ကျောင်းများကို တည်ဆောက်ပြီးစီးခဲ့ပါသည်။
၃။ သထုံခရိုင် သစ်ဆိပ်အနီး ကဿဖရွာ ကဿဖချောင်းဖျားတွင် တည်ရှိသော မဥတောင်ပေါ်၌ အရှင်
မဟာကဿဖမထေရ် ယူဆောင်လာသည့် ဓာတ်တော်များနှင့် ရွှေပန်းငါးခိုင်အား ဌာပနာ၍
တည်ထားတော်မူခဲ့သော ဆုတောင်းပြည်ဘုရားကို ထပ်မံတည်ထားပြီးမြောက်ခဲ့ပါသည်။
(ဉာစ်တော်အမြင့် ၇၅-တောင်ရှိ၏။)
၎။ ဟံသာဝတီပြည်ရှိ ဓနုတ်ဘုရားကြီးကို ထပ်မံပြင်ဆင်၍ တည်ထားပြီးစီးခဲ့ပါသည်။
(ဉာဏ်တော်အမြင့်
၁၂၅-တောင်ရှိ၏။
၅။ ဖျာပုံခရိုင်တွင် သမိန်ထောရာမ ဖောင်တော်ဦးဘုရားကြီးကို တည်ထားပြီးစီးခဲ့ပါသည်။
( ဉာဏ်တော် အမြင့် ၇၅-တောင် ရှိ၏)
၆။ ပုသိမ်ခရိုင် ၀ါးခယ်မမြို့နယ် မရမ်းကျိုက်ပိ၌ စိတ်ဘုရားကို တည်ထားပြီးစီးခဲ့ပါသည်။
(ဉာဏ်တော်အမြင့် ၉၉-တောင် ရှိ၏။)
၇။ က၀မြို့နယ်၌ လေးကျွန်းမာရ်အောင် စေတီတော်ကို တည်ထားပြီးစီးခဲ့ပါသည်။
(ဉာဏ်တော် ၇၅-တောင်ရှိ၏)
၈။ အဆိုပါ လေးကျွန်းမာရ်အောင် ဘုရားအနီး မြေနေရာတွင် ပုပ္ပါးတောင်ကလာပ် ပုံသဏ္ဍာန်ပြုလုပ်၍
တောင်ကလာပ်ပုံပေါ်တွင် အောင်ဆုပန်စေတီတော်တဆူ တည်ထားပြီးစီးခဲ့ပါသည်။
(ဉာဏ်တော် ၃၇-တောင် ရှိ၏။)
ဤကား
ရသေ့ကြီးဦးခန္တီ၏သာသနာပြုလုပ်ငန်းများ အနက်မှ တစိတ်တဒေသမျှသာ ဖြစ်ပါသည်။
စင်စစ် ရသေ့ကြီးဦးခန္တီသည် ပါရမီရှင်ပုဂ္ဂိုလ်တဦး ဖြစ်၏။ ၄င်း၌ ထူးခြားသော
လက္ခဏာကြီးငယ်များရှိလေရာ လေ့လာမိသမျှ တင်ပြရသည်ရှိသော်---
၁။ မျက်နှာတော်တွင် နဖူးပြင်က ဆင်ဦးကင်းကဲ့သို့ ပုံသဏ္ဍာန်ရှိခြင်း။
၂။ လည်ပင်းတွင် လည်ရစ်သုံးတန် ရှိခြင်း။
၃။ လက်ရင်း၌ ကြာဖိုကြာမ ရှိခြင်း။
၎။ လက္ခဏာတွင် ငါးကြင်းပုံတော် ပေါ်နေခြင်း။
၆။ လက်ရင်းတွင် အရစ် ဆယ့်ကိုးရစ်ရှိခြင်း။
၇။ ခြေသလုံးတွင် မြွေသဏ္ဍာန် မြွေမျက်လုံးနှစ်လုံး ရှိခြင်း။
၈။ ခြေဖ၀ါးတွင် ကြက်ခြေခတ်များ ပါရှိခြင်း။
၉။ ဒူးတွင် ဆင်ဦးနှာမောင်းပုံသဏ္ဍာန်နှင့် ပျော့ပျော့ပျောင်းပျောင်း ရှည်လျားစွာရှိခြင်း။
၁၀။ လက်ဖ၀ါးတွင် စကားဝါအပွင့် ပါရှိခြင်း
စသော
ကြန်အင်လက္ခဏာများရှိကြောင်း လေ့လာသိရှိရပေရာ သာသနာပြုပုဂ္ဂိုလ်ဖြစ်သော
ပါရမီရှင်ဖြစ်သော ရသေ့ကြီးဦးခန္တီကား မြန်မာနိုင်ငံ၏ သာသနာသမိုင်းတွင်
ထာဝရထင်ရှားနေမည့် ပုဂ္ဂိုလ်ထူးပုဂ္ဂိုလ်မြတ်ဖြစ်ကြောင်း ကောက်ချက်ချရမည်သာ
ဖြစ်ပါတော့၏။
မောင်စံထား (ဓနုဖြူ)
No comments:
Post a Comment